ការ​ហ៊ោ​អបអរ​ត្រូវ​​​ហាមប្រាម​ក្នុង​ជំនួប​ជម្រុះ World Cup រវាង​ថៃ​និង​អូស្ត្រាលី​

ការ​ប្រកួត​វគ្គ​ជម្រុះ FIFA World Cup 2018 ជុំ​ផ្ដាច់​ព្រ័ត្រ​ប្រចាំ​ទ្វីប​អាស៊ី​នៅ​ថ្ងៃ​ទី​១៥​​ខែ​វិច្ឆិការ​ខាង​មុខ​រវាង ថៃ និង អូស្ត្រាលី ត្រូវ​បាន​ហាម​ប្រាម​មិន​ឱ្យ​មាន​ការ​ហ៊ោ​អបអរ​ឡើយ ដ្បិត​ប្រទេស​ថៃ​កំពុង​បន្ត​កាន់​ទុក្ខ​​​នៃ​ការ​យាង​ចូល​ទិវង្គត់​​របស់​ព្រះ​មហាក្សត្រ ភូមិបុល អាប់ឌុលយ៉ាដេត​។
សហព័ន្ធ​កីឡា​បាល់ទាត់​ប្រទេស​ថៃ​និង​អូស្ត្រាលី ក៏​បាន​លើក​ឡើង​ផង​ដែរ​ថា​អ្នក​គាំទ្រ​ដែល​ចូល​ទស្សនា​គួរ​​ស្លៀក​ពាក់​ពណ៌​ខ្មៅ ប្រផេះ ឬ​ ស​។
មុននេះ សហព័ន្ធ​កីឡា​បាល់ទាត់​ថៃ​ព្យាយាម​ស្នើ​សុំ​ផ្លាស់​ប្ដូរ​ទីតាំង​ប្រកួត​ទៅ​ធ្វើ​នៅ​សិង្ហបុរី ប៉ុន្តែ​ត្រូវ​បាន​សហព័ន្ធ​កីឡា​បាល់ទាត់​អូស្ត្រាលី​បដិសេធ​។
រាជ​រដ្ឋា​ភិបាល​ថៃ​បាន​ប្រកាស​កាន់​ទុក្ខ​ថ្នាក់​ជាតិ​រយៈ​ពេល​១​ឆ្នាំ​​សម្រាប់​ស្ថាប័ន​រដ្ឋ​ចំពោះ​ការ​បាត់​បង់​ព្រះ​មហាក្សត្រ​​ជា​ទី​គោរព​បំផុត​របស់​ពួក​គេ ស្រប​ពេល​ប្រជាជន​ត្រូវ​បាន​ស្នើ​ឱ្យ​ស្លៀក​ពាក់​ខ្មៅ​និង​ចៀស​វាង​ពី​ព្រឹត្តិការណ៍​បែប​សប្បាយ​ៗ​នានា​៕