ញាក់សាច់ ! ខឹងមានប្រពន្ធចុង ប្រពន្ធដើមជួលឃាតករសម្លាប់ប្តី

រាជធានីភ្នំពេញ ៖ នៅទីបំផុត កម្លាំងអាវុធហត្ថរាជធានីភ្នំពេញបានធ្វើការស្រាវជ្រាវ និងស៊ើបអង្កេតរហូតចាប់ខ្លួនក្រុមឃាតករបាន៣នាក់ហើយបន្ទាប់ពីពលរដ្ឋបានប្រទះឃើញសាកសពបុរសម្នាក់កាលពីវេលាម៉ោង១០ និង៤៥នាទីព្រឹក ថ្ងៃទី១៤ ខែតុលា ឆ្នាំ២០១៦ នៅចំណុចប្រឡាយទឹកមានគំនរសំរាមជាច្រើន ក្នុងភូមិគោកចំបក់ សង្កាត់ចោម ខណ្ឌពោធិ៍សែនជ័យ ដោយសង្ស័យថាជារឿងឃាតកម្ម ។
ប្រភពព័ត៌មានពីមន្ត្រីអាវុធហត្ថរាជធានីភ្នំពេញ បានឲ្យដឹងថា បន្ទាប់ពីធ្វើការស្រាវជ្រាវយ៉ាងល្អិតល្អន់ សមត្ថកិច្ចស៊ើបដឹងថា សាកសពដែលគេប្រទះឃើញនេះគឺជាករណីឃាតកម្មពិតប្រាកដមែន រហូតឈានទៅឃាត់ខ្លួនបានក្រុមឃាតករ៣នាក់ ដែលក្នុងនោះប្រពន្ធដើមជាមេខ្លោង និងជាអ្នកជួលឃាតករឲ្យសម្លាប់ប្តីរបស់ខ្លួនឯង ព្រោះតែខឹងប្តីមានប្រពន្ធចុង ។
ជនសង្ស័យទាំង៣នាក់ដែលសមត្ថកិច្ចចាប់ខ្លួនមាន ១-ឈ្មោះ សៅ សំអឿន ភេទស្រី អាយុ៤៦ឆ្នាំ ជាប្រពន្ធដើម និងជាមេខ្លោងជួលឃាតករឲ្យសម្លាប់, ២-ឈ្មោះ សូ ផា ហៅ ហួត ភេទប្រុស អាយុ៣០ឆ្នាំ មុខរបររត់រថយន្តឈ្នួល នៅផ្ទះជិតគ្នា និង ៣-ស្រីស្នេហ៍របស់ឈ្មោះ សូ ផា ។ ជនសង្ស័យទាំង៣នាក់នេះត្រូវបានចាប់នៅចំណុចផ្ទះជួលជាប់របងសួនឧស្សាហកម្មកាណាឌីយ៉ា ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីយប់ថ្ងៃទី២០ ខែតុលា ឆ្នាំ២០១៦ ។
ប្រភពព័ត៌មានពីមន្ត្រីអាវុធហត្ថរាជធានីភ្នំពេញ បានឲ្យដឹងទៀតថា សពជនរងគ្រោះឈ្មោះ កៅ ផា ភេទប្រុស អាយុ៤៨ឆ្នាំ មុខរបររត់រថយន្តឈ្នួល រស់នៅភូមិចុងព្រែក ឃុំកំពង់ត្របែក ស្រុករមាសហែក ខេត្តស្វាយរៀង មានប្រពន្ធដើមឈ្មោះ សៅ សំអឿន អាយុ៤៦ឆ្នាំ មានកូន៤នាក់ ប្រុស៣នាក់ ស្រី១នាក់ និងមានប្រពន្ធចុងឈ្មោះ ចាប សាម៉េត អាយុ៣៣ឆ្នាំ ជាកម្មកររោងចក្រ មានស្រុកកំណើតនៅភូមិតាហង់ ឃុំអណ្ដូតពោធិ៍ ស្រុករមាសហែក ខេត្តស្វាយរៀង ។
ប្រភពបញ្ជាក់ថា ដោយសារខឹងប្តីមានប្រពន្ធចុង ស្ត្រីជាប្រពន្ធដើមបានរៀបគម្រោង និងជួលឃាតករ២នាក់ឲ្យសម្លាប់ប្តីរបស់ខ្លួន ។ ដោយនៅថ្ងៃទី១១ ខែតុលា ឆ្នាំ២០១៦ ឈ្មោះ សូ ផា និងស្រីស្នេហ៍ធ្វើជាជួលរថយន្តទៅខេត្តសៀមរាប ដោយចេញដំណើរពីខេត្តស្វាយរៀងនៅវេលាម៉ោង៤ទៀបភ្លឺថ្ងៃទី១២តុលា ។ ខណៈធ្វើដំណើរដល់ខេត្តកំពង់ធំ ខណៈជនរងគ្រោះឈ្មោះ កៅ ផា ចុះនោម ជនសង្ស័យក៏បានវ៉ៃពីក្រោយរហូតស្លាប់រួចដឹកបានរថយន្តមកចងដុំថ្មទម្ងន់ប្រហែល១០គីឡូក្រាមភ្ជាប់ជាមួយចង្កេះជនរងគ្រោះរួចយកទៅទម្លាក់ចោលក្នុងប្រឡាយទឹកដែលមានសុទ្ធតែសម្រាមតែម្តង ៕